Musin Zazu

Va Zazi day dah ya da day, va Zazi day dah ya da day!
Sarralc siynaçu bacalaxh mangal bittina,
Cxha çhogha khadvella ċa qeçin-qa so.
Gheldellaçu deghana kotam zhizhig darba du alar-qa.
Vay yüycinçu khariyçüra njänina ullo xuuš yolu,
Docu ċoga dolu kotam sxhalace,
Dünençoxh aysa yokquçu xanna ċqha a
Sa dolçu humanna sa däkqina vacar-qa so,
Lulaxoška cunna urs xhaqiyte, i tilaey,
Zhizhig-galnaš tardexha vayna:
Xhöca zabarš yan dog doghur dacar-te,
Va Zazi day dah ya da day.
Bokqu kog baybina, Musin Zazu ghättira.
Yüycinçu khari çu yaxana, njänina ullo xuuš yolu,
Docu ċoga dolu kotam the essala küg qovdiyna,
Kotame vaak aliytina, njänina xala ca xötüytuš,
Cunna urs xhoquš gaytina,
Šen mayrça Musin dog ca ešoš,
Küyrano qoqa sanna, ša kade tiliyna,
Yay çu öllina, yay khezh’yaxa bölça.
Veana çu velira, diynaxh sarralc vizhna jülluš,
Cxhanxha bolx ca beš,
Volavella lelaš volu Ċömurqha.
Assalam jalaykum, süyre dika xülda šun, älla.
Xhe the ghazh töxça sanna, xhe the šad hottiyna,
Musi ma xhövzira-tov.
Šiytta šaraxh diynaxh xhäqna bocu nuy,
Märkhazhal thäxha xhe qa Zazu ma yüylira-tov.
Ċömurqha vaххane dja ca vödiy хi’ça,
Thak qa vistхilira, baх, Musi:
Хeziy xhuna, vay boхurg хila ca dollu qünaх,
Ċqha çu yolaxha, day dah ya da day.
Hinca hu baх-te axh stag, älla, Zazu sxhahöttira.
Šiytta šo xhalхa, cxhana xhostamaх xhalaöllina,
Cxha a qa deçig oluš, deçig-pondar bar- qa san,
Ghoy sxhaloxha söga i, ho qa vay lulaхoçunna
Cxha bayt era yar- qa ša.
Djavalaxha Deladöxha, hinca, šiytta šaraxh
Ca älla bayt, tхovsa miçara ala vollu xho,
Älla, thera degiza çan yegiyna, sxha belira pondar.
Xhalхara pхa oziyna, muqhame baliyna,
Šozlagha pхa oziyna, ešare berziyna,
Qozlagha pхa oziyna, oziyna-a, thaх, älla, хadiyna,
Bayt ala ma vülira Musi, va Zazi day dah ya da day!
Va Zazi day dah ya da day, va Zazi day dah ya da day!
Valanza ca välla, san xhayçul xhalхa valar nislaxh,
Yaхanza ca yälla, xhay mare yaхar nislaxh.
Ho qu vay lulara Ċömurqha sanna,
Diynaxh sarralc vizhna jülluš,
Cxhanxha bolх ca beš, neхa çu hüttuš,
Neхa šun talхoš yolçu kuyna baqhone
Xho yeхa Zhumiyn A qtulla, Madiyn Zhämmirza,
Evturхoyn Axhmad, ho qu dünenthexh mel volu
Vok qu stag varaх, mare ca yöduš,
Jaхar yaхalaxh, va Zazi day dah ya da day!

Мусин Зазу

Ва Зази дай дахI я да дай, ва Зази дай дахI я да дай!
Сарралц сийначу бацалахь мангал биттина,
Цхьа чIогIа кIадвелла цIа кхечин-кха со.
ГIелделлачу дегIана котам жижиг дарба ду алар-кха.
Вай юьйцинчу кIарийчуьра нIаьнина улло хууш йолу,
Доцу цIога долу котам схьалаце,
Дуьненчохь айса йоккхучу ханна цIкъа а
Са долчу хIуманна са даьккхина вацар-кха со,
Лулахошка цунна урс хьакхийте, и тилаей,
Жижиг-галнаш тардехьа вайна:
Хьоьца забарш ян дог догIур дацар-те,
Ва Зази дай дахI я да дай.
Боккху ког байбина, Мусин Зазу гIаьттира.
Юьйцинчу кIари чу яхана, нIаьнина улло хууш йолу,
Доцу цIога долу котам тIе эссала куьг кховдийна,
Котаме ваак алийтина, нIаьнина хала ца хоьтуьйтуш,
Цунна урс хьокхуш гайтина,
Шен майрча Мусин дог ца эшош,
Куьйрано кхокха санна, ша каде тилийна,
Яй чу оьллина, яй кIежъяха боьлча.
Веана чу велира, дийнахь сарралц вижна Iуьллуш,
Цхьанхьа болх ца беш,
Волавелла лелаш волу ЦIоьмуркъа.
Ассалам Iалайкум, суьйре дика хуьлда шун, аьлла.
Хье тIе гIаж тоьхча санна, хье тIе шад хIоттийна,
Муси ма хьоьвзира-тов.
Шийтта шарахь дийнахь хьаькхна боцу нуй,
МаьркIажал тIаьхьа хьекха Зазу ма юьйлира-тов.
ЦIоьмуркъа ваххане дIа ца воьдий хиъча,
ТIаккха вистхилира, бах, Муси:
Хезий хьуна, вай бохург хила ца доллу кхуьнах,
ЦIкъа чу йолахьа, дай дахI я да дай.
ХIинца хIу бах-те ахь стаг, аьлла, Зазу схьахIоьттира.
Шийтта шо хьалха, цхьана хьостамах хьалаоьллина,
Цхьа акха дечиг олуш, дечиг-пондар бар-кха сан,
ГIой схьалохьа соьга и, хIокха вай лулахочунна
Цхьа байт эра яр-кха ша.
ДIавалахьа Деладоьхьа, хIинца, шийтта шарахь
ца аьлла байт, тховса мичара ала воллу хьо,
Аьлла, тIера дегиза чан йегийна, схьа белира пондар.
Хьалхара пха озийна, мукъаме балийна,
ШозлагIа пха озийна, эшаре берзийна,
КхозлагIа пха озийна, озийна-а, тIах, аьлла, хадийна,
Байт ала ма вуьлира Муси, ва Зази дай дахI я да дай!
Ва Зази дай дахI я да дай, ва Зази дай дахI я да дай!
Валанза ца ваьлла, сан хьайчул хьалха валар нислахь,
Яханза ца яьлла, хьай маре яхар нислахь.
ХIокху вай лулара ЦIоьмуркъа санна,
Дийнахь сарралц вижна Iуьллуш,
Цхьанхьа болх ца беш, неха чу хIуьттуш,
Неха шун талхош йолчу куйна бакъоне
Хьо еха Жумийн Акхтулла, Мадийн Жаьммирза,
Эвтурхойн Ахьмад, хIокху дуьнентIехь мел волу
Воккху стаг варах, маре ца йоьдуш,
Iахар яхалахь, ва Зази дай дахI я да дай!